Ndërsa mund të mendoni se kur shihni borë apo shi jashtë dritares suaj është më e sigurt të qëndroni në shtëpi nën batanije dhe të mos i vishni atletet e vrapimit deri në pranverë, në të vërtetë nuk duhet të jetë kështu. Vrapimi në mot më të ftohtë ka avantazhet e tij nëse ndjekim disa hapa të rëndësishëm për të ruajtur shëndetin dhe imunitetin.
PËRFITIMET E VRAPIMIT NË MOT TË FTOHTË
- Aerobia është një aktivitet që është jashtëzakonisht i rëndësishëm për shëndetin e sistemit kardiovaskular. Ecja e shpejtë, vrapimi, çiklizmi apo diçka e ngjashme për 150 minuta në javë rrit ndjeshëm kapacitetin e mushkërive dhe zemrës. Pavarësisht se është ftohtë, nuk duhet ta ndaloni këtë lloj aktiviteti, mjafton të përgatiteni siç duhet.
- Moti i ftohtë mund të përmirësojë më tej metabolizmin tonë, pasi aktivitetet në temperatura më të ulëta djegin kalori shtesë për të arritur temperaturën optimale të trupit.
- Akomodimi i trupit ndaj aktivitetit më të ftohtë mund të forcojë sistemin tonë imunitar dhe të parandalojë ftohjet e shpeshta gjatë dimrit.
- Nuk duhet neglizhuar as shëndeti mendor, i cili është shumë më i ndjeshëm në ditët e dimrit, sidomos kur nuk ka diell. Jemi më të prirur të mbyllemi brenda, të shtrihemi më gjatë dhe të shmangim aktivitetet fizike. Disa shëtitje të gjata ose një vrapim i lehtë do të na forcojë fizikisht dhe mendërisht dhe do të rrisë ndjeshëm nivelin e hormoneve të lumturisë.
- Mendoni se sa më shpejt dhe më në formë do të jeni në pranverë nëse vazhdoni stërvitjen në dimër, në krahasim me rikthimin e dhimbshëm të vrapimit pas një pushimi për disa muaj.
KËSHILLA TË RËNDËSISHME PËR VRAPIMIN NË DIMËR
- Para se të dilni nga shtëpia për vrap, sigurohuni që të kontrolloni parashikimin e motit. Nëse shihni se do të ketë një stuhi dëbore ose shiu, mund të jetë më e mençur të zëvendësoni vrapimin tuaj atë ditë me disa ushtrime në ambiente të mbyllura.
- Veshja e duhur është tepër e rëndësishme sepse mund ta bëjë vrapimin shumë më të lehtë dhe më të bukur. Veshjet me shtresa, çorape të ngrohta, doreza, kapele ose shirit koke, si dhe atlete kundra ujit janë pajisjet bazë që ju duhen.
- Ju e dini se do t'ju duhet shumë më shumë kohë për të ngrohur muskujt dhe për të arritur temperaturën optimale të trupit në mot të ftohtë, prandaj sigurohuni që të ecni më ngadalë se zakonisht dhe lëreni atë ritëm më të ngadaltë të zgjasë më gjatë, derisa të ndiheni të ngrohur dhe gati për të shpejtuar.
- Meqenëse dita është më e shkurtër dhe ka mundësi t‘iu zërë në errësirë, kini parasysh se dukshmëria është më e ulët edhe për drejtuesit e mjeteve, veçanërisht nëse gjatë rrugës ju kap shiu. Për këto arsye, është një ide e mirë të vishni ngjyra reflektuese, të ndezura. Tani, shumë veshje të garave dimërore kanë pjesë që shihen në errësirë pikërisht për këto arsye, kështu që nëse shihni një pjesë të tillë në dyqan, duhet ta blini patjetër. Nëse nuk vraponi në qytet, por në natyrë, atëherë feneri është zgjedhja për ju. Sigurisht, opsioni më pa dhimbje është vrapimi gjatë ditës.
Shpresoj që këto këshilla t'ju ndihmojnë. Shijojeni dhe vraponi të lumtur!
Anica Radosavljević @anicateretanica
